2010. urte amaieran, premia eta eskaeraren gaineko ikerketa egin zuten eta 2011. urteko maiatzean, etxe hutsen gainekoa. AZTIKER soziologia ikerguneak egin ditu azterketok, Bergarako Udalaren ekimenez.
Jesus Elortza alkateak adierazi du azterketekin lortu gura nahi izan dela: “Alde batetik, bergararron etxebizitza premiak ezagutzea eta, aldi berean, dagoen eskaera ezagutzea; eta, beste alde batetik, Bergaran dagoen etxebizitza hutsen kopurua eta kokapena ezagutzea”.
500 bergarar etxebizitza premian
Etxebizitza premia eta eskaeraren ikerketaren arabera, 500 bergarar inguru dira lehenengo etxebizitzaren premia dutenak. Eta duten behar horren larritasun maila handia dela zehazten da. Bestalde, ezaugarriei dagokienean, bi gelako etxebizitzak dira gehien eskatzen direnak eta kokapenari dagokionez, balorazio onenak jaso dituzten auzoak izan dira: Bolu, San Lorentzo eta erdigunea. Azterketak zehazten du etxea erosterako orduan, %70ak ezingo lukeela 210.000 euro baino gehiago ordaindu.
300 etxebizitzatik gora hutsik
Etxe hutsen azterketari dagokionez, AZTIKERek egin duen ikerketaren arabera, 334 etxebizitza daude hutsik. Hala ere, zehaztu dute horiek direla beraiek zehaztasun osoz identifikatu dituztenak, eta gehiago direla hutsik daudenak. Gehienak erdigunean daude eta 68 landa eremuan.
Horrenbestez, azterketan ondorioztatzen da: etxebizitza premia asetzeko baino, etxebizitza huts gehiago daudela. Beraz, Asier Etxenike AZTIKEReko teknikariaren arabera, ez litzateke gehiago eraiki behar, dauden beharrak asetzeko, etxebizitzekin beste politika batzuk bideratu beharko liratekeela uste du.
Bergararren %64,3aren iritziz, etxebizitzarena da herriak duen arazorik larriena edo larrienetakoa. Jesus Elortza alkateak adierazi du Udalak hausnarketa egingo duela jaso dituen emaitzekin.