Espainiako gerran Osintxuko bost lagun hil zituztela 75 urte betetzen dira aurten eta haiek gogora ekartzeko hainbat ekitaldi antolatu dituzte, Osintxun, 75 urte isilean gordetako gure historia osatzen izenburupean.
1936ko urriaren 20an erreketeak sartu ziren Osintxun arratsaldean, Soraluzetik, eta zazpi lagun atxilotu zituzten. Felipe Garmendia okinaren kasuan, Textil Arretxeko ugazabaren bitartekaritzari esker askatu egin zuten eta Anbrosio Agirrek azken unean ihes egitea lortu zuen.
Egunean bertan, iluntzean, bost lagun fusilatu zituzten Gerondotik Mekolderako tartean, Paris Gainen, garai baten Mekolaldeko futbol zelaia egon zen lekutik oso gertu. Tomas eta Ildefonso Iñarra anaiak, Jose Garaikoetxea, Ricardo Zangitu eta Rufino Akizu izan ziren fusilatutakoak.
Omenaldia domekan
Fusilatutakoak oroitzeaz batera, haien senitartekoei Ezin izan zuten askatasunaren hego haizea gelditu lelopean omenaldia egingo zaie domekan. Eguerdian meza izango da Osintxun eta ondoren martxa egingo da Gerondoraino. Omenaldia 13:00etan izango da.
Hil zituzten lekuan Jon Balentziagak egindako eskultura jarriko dute. Horrekin batera, eguaztenean, hilak 19, Juan Ramon Garairen Gerra eta errepresioa Osintxun hitzaldia izango da Osintxuko eskolan, 19:30ean.
Bezperarako, zapaturako, Intxortako ibilbide tematikora irteera antolatu dute.