Urte hauetan guztietan antzeko egitarauari eutsi diote antolatzaileek eta aurten ere ez da apartako nobedaderik izango. Azaroaren hasieran Itziarren ospatzen duten feriarekin batera, mendiko ganaduari zuzendutako feria bakarretakoa da Elosukoa. 1970eko hamarkadan ekin zioten Elosuko feriari.
Aurten ere Elur Txiki elkarteko lagunak arduratuko dira antolaketaz, Bergara eta Azkoitiko udalen laguntzarekin. Feria 09:00etan zabalduko dute eta goiz osoan zehar abelburuak izango dira protagonista: behiak, zaldiak, behorrak, zezenak, idiak edo astoak tartean. Talogileak eta bestelako postuak ere ez dira faltako. Aste erdian jausten denez, asteazkenean bisitari ugari espero dituzte antolatzaileek.
Eguerdian ohikoa denez bertsolarien saioa izango da, sari banaketaren aurretik. Kategoria ezberdineko irabazleak 13:00etan sarituko dituzte, Elosuko pilotalekuan. Egun osoan zehar Epelde eta Lutxurdio trikitilariek jardungo dute eta arratsalderako desafio bitxia iragarri dute antolatzaileek: Bentaosteren idia Iturralderen behorraren aurka.
Autobusean hobeto
Aurreko urteotan bezala autobus zerbitzu berezia izango da Elosura igotzeko eta ahal dela autobusa erabiltzea gomendatu dute.