"Esperientziaren antzerkia" bezala definitzen dute. Bertan, bizipenek "hautsak harrotu" eta "kontzientzia ukitzen" dute-eta. "Torturaren zulo beltzetik igarotze bat konpartituko dugu", pertsona bakoitzaren morala agerian utziz. Gure kontzientziarekiko borroka azaletik ez ezik, barrutik ere bizitzeko gonbita egin dute antzezlanaren egileek.
Antzerki lan honetan deskribatzen den egoera muturreko axioma bat da: aktibista batek leku publiko batean anabasa sortuko duen bonba bat jartzen du. Poliziaren erabakia, hau torturatu eta horrela ezbeharra ekiditea da.
"Ez dauka ondoriorik"
"Antzezlanak ez dauka irakaspenik, ez dauka ondoriorik, bakoitzak bere kontzientziarekin borrokatuz eraiki beharko ditu. Non dago onargarria eta onartezinaren arteko muga?" diote egileek. "Behin torturari atea irekita, hau ezin da inoiz itxi. Ireki ditzagun begiak…" diote.
Bergarako Gazte Asanbladak antolatu du antzezlana. Ostean, mahaingurua izango da, bertaratzen guztiei parte hartu ahal izango dutelarik.