Bergarako Udaleko enpresa komiteak gogoratu du Benito Davila Muñozek eta Agapito Blazquez Sanchezek lanean zihardutela, Elorregiko kanposantuan belarra mozten ibiliak zirela, bueltan, auto istripu larria izan eta Benitok bizia galdu zuenean.
"Izugarria da honelako egoera batek sortzen duen ezintasuna eta samina. Tristea da benetan lanera etortzea bizimodua aurrera atera ahal izateko eta bertan heriotza ordainean jasotzea", dio Bergarako Udaleko enpresa komiteak argitara emandako oharrak.
"Egoera tamalgarri honen inguruan hausnartzeko eta enpresa komiteak duen planteamendua azaltzeko, eztabaidatzeko eta bozkatzeko" gaur goizean, 11etan batzarra deitu dute udaletxeko Pleno Aretoan. Ondoren, elkarretaratzea egingo dute udaletxe aurrean.
"Gero deituko dizut"
Benito Davila eta baita herriko enterradore nagusia, Luisi Dominguez, oporretan dena, GOIENAren kolaboratzaileak dira. Astero ematen digute hildakoen berri; gero, paperekoan argitaratzeko. Atzo ere horixe zen asmoa. GOIENAren langile batekin berbetan izan zen Benito Davila, atzo, goizeko 11:00ak aldean, istripua gertatu baino ordu erdi lehenago. "Belarra mozten nabil, Elorregin, eta Bergarara heltzen naizenean deituko dizut" esan zion Davilak Goienako langileari. Ezin izan zuen deirik egin. Bidean galdu zuen bizia, istripu larrian.
GOIENAk samina adierazi nahi du ohiko kolaboratzailearen heriotza dela-eta.
Benito Davilak 56 urte zituen. Istripua gertatu eta berehala hil zen, Pesako autobus baten kontra aurrez aurre jo ostean. Davila bera zihoan autoa gidatzen. Ondoan zihoanak, Agapito Sanchezek, zorte hobea izan zuen eta onik dago Arrasaten, erietxean. Osasun zerbitzuak istripua gertatu zen tokira ailegatu zirenerako eta suhiltzaileek autotik atera zutenerako hilda zen Benito Davila.