Abuztu bukaerarako erabilgarri izatea zen hasierako asmoa, baina euriek sortutako eragozpenengatik eta opor egunen ondorioz, astebetez atzeratuko da irekiera.
Abuztu hasieran hasi zituzten Algodonera eta Mayc arteko bidegorri zatiaren lanak eta Udalaren aurreikuspenak betetzen badira, irailaren 10ean zabalduko dute oinezko zein ziklistentzako bide berria.
Bidegorri zati hori 216 metro luze da eta bi metro inguru ditu zabaleran; orain arte egon den ubidea, sakonera handikoa eta arriskutsu samarra, estali egin dute bidegorriaren zabalera handitzeko. Lanak egiteko zuhaitzak eta argiztapena lekuz mugitu dituzte eta hurrengo astean asfaltatuko dute. Porlana bota dute, baina oraindik bidea itxita dago. Oinezkoendako eta bizikletan joateko tokia izango da; honenbestez, bidea zabaldu egingo dute.
Lanok Antia S.L. eta Excavaciones y obras de Diego S.L. aldi baterako enpresak egiten dihardu eta 160.000 euroko aurrekontua dute. Aurrekontu horren barruan, Lazpiur S.A. enpresa eta Gorostola baserriaren arteko bidegorria ere sartzen da. Uztailaren 19an hasi zituzten lan horiek eta abuztuaren erdialdean zabaldu zuten bidea. Zati honek, besteak bezala, trenbide zaharraren bidea hartu du.
