Debagoienera egubakoitz gauean, 21:00ak aldera, iritsi ziren: Trekutzetik sartu eta Hirukurutzetatik irten. Iragarritakoa baino 10 bat minutu beranduago, 21:05 inguruan, sartu ziren lehenengo korrikalariak Elosuko gunera; azkenak, ostera, 20 bat minutu lehenago, gauerdia pasatxoan.
Bergarako Pol-Pol mendizale taldeko kideek eta hainbat zalek egin zieten harrera. Aurpegi onarekin zetozen eta txip-kontrola pasatu ondoren mokadutxoa hartzeko aukera izan zuten indarrak berreskuratzeko. Gorlako kantina inguruan, gainera, trikitilariak izan zituzten animatzeko. Bergarar batek, baina, orkatila bihurritu zuen inguru horretan, eta erretiratzea erabaki zuela jakinarazi zuten Pol Polekoek.
Iaz ez bezala, giro ona izan zuten korrikalariek, eta hasieratik buruan jarri zirenek erritmo bizia ezarri zuten. Proba gogorra da, baina, Ehunmiliak, eta iazko txapeldun Imanol Aleson, esaterako, erretiratu beharrean izan zen.