Hori da marka hori zurea...
Bai, soldadutzatik etorritakoan hasi nintzen Udal Txistulari Bandan. Gaztetan futbola eta musika ziren nire zaletasun handienak. Bergarako futbol taldean 30 urte bete arte-edo jokatu nuen. Volante jokatzen nuen. Futbola laga baino, ondorengoek hartuko zidaten lekua... Udal Txistulari Bandan, besteak beste, Boni Laskurainekin eta Joseba Labordarekin ibilita nago. Joseba hil zenean, 68an, ni izendatu ninduten zuzendari. Eta gaur egun Josebaren biloba, Ander Laborda, dabil gurekin...
Zenbat lagun zarete gaur Bandan?
Sei. Amaia Lazkano, Ander eta neu txistulari; Aitzol Ostogain eta Martin Garmendia dira silboteak eta atabalarekin Ekaitz Otxoa dihardu iazko San Martzialetatik. Lauzpabost lagun ere ibili gara sasoi batzutan, baina aspaldian sei gara. Baina denok ez gara joaten beti, lau lagun jeneralean.
Zelan hasi zinen txistua joten?
Julian Etxaniz lehengusuak silbotea joten zuen eta Julianek anaia txistuarekin laguntzea nahi zuen. Egur koloreko txistua genuen etxean, ni animatu nintzen nonbait eta gaur arte.... Hasi berri izan nuen txistu hura galdu egin nuen. Orain erabiltzen dudana eta beste bi dauzkat, aspaldian jo ez ditudanak.
Txistulariondako ez dago erretirorik...
Osasunak laguntzen didan bitartean... Batzuk paseoan, igeriketan edo korrika ibiltzen dira. Niretako txistua da ariketarik onena, joten dudan bitartean arnasketa lantzen dudalako.
Ilusioa egingo zizun San Martzialetan jasotako omenaldiak.
Hitz barik geratu nintzen. Zerbait esan nahi eta ezin... Etxekoek ere ez zekiten ezer, sorpresa izan zen guztiondako, eta pena dut ez zirelako igo San Martzialera.
Etxean izan duzu erreleborik?
Semea eta alaba nirekin jotakoak dira biak, baina lagata daukate.
Pieza kuttunen bat?
Anai biak, Jeronimo aitak kanturako egina eta Miguel Gonzalez Bastidak armonizatutakoa.
Bergarako jairik bereziena?
Sanmartzialak, jai alaia delako eta ohiturei eusten diegulako. Jende asko joan da aurten baita eta horrek ematen dio indarra. Santa Marina eguna dator orain, Basalgoko jaiak... Asko daude.