Halaxe dio Bergarako Udaleko kirol zerbitzuak bidalitako oharrak: "Egun batzuetan zehar, zenbait herritar, gauez, Agorrosingo jolas igerilekuan sartu eta hainbat barrabaskeria egin dituzte. Horien artean, azpimarratu, igeri egiteko ontzian bertan kaka egin dutela eta kristalezko botilak ere utzi dituztela".
Halakoetan, kaltetuenak "herritarrok berok" garela dio oharrak, jolas igerilekua bera garbitzeko eta atontzeko denbora hartu behar denez, "jolas igerilekuarekin gozatzerik ez daukagulako".
Horiek horrela, Udalak herritar ezezagun horiei zera adierazi nahi die: "Mesedez eta arren, bere jokabideak moldatzeko". Azkenik, herritar guztiei jakinarazi nahi die, "beharrezkoak diren neurriak" hartzen saiatuko dela Udala, "halako gertaerak errepika ez daitezen".