Urtero ikasturte amaieran egiten den ekitaldia da hori, eta dagoeneko ohitura bilakatu da Bergarako Musika Eskolan ikasten duten gaztetxoentzat. Hain zuzen, bi diploma mota banatzen dira ekitaldi horretan: bigarren mailako diplomak, batetik, eta hirugarren mailako diplomak, bestetik.
Aurten egingo den ikasturte amaierako kontzertu horretan, 26 ikasle izango dira bigarren mailako diploma horiek jasoko dituztenak eta hirugarren mailako diplomak, berriz, hiru ikaslek bakarrik eskuratuko dituzte.
Kontzertua Zabalotegi aretoan
Eta irakasle eta ikasleen arteko zerbait izan ez dadin, kontzertu bat antolatu dute Bergarako Zabalotegi aretoan, edonork ikusi ahal izango duena. Hala ere, gurasoei dago zuzenduta batez ere, euren seme-alabek ikasturtearen zehar ikasi dutena ikusteko aukera izan dezaten.
Hainbat musikarik hartuko dute parte, eta akordeoia, oboea, biolina, pianoa, flauta, saxofoia, gitarra, klarinetea, tuba eta fagota izango dira ekitaldi horretan entzun ahal izango diren musika instrumentu nagusiak.
Datorren eguaztenean, hilaren 22an, arratsaldeko zazpietan izango du ekitaldi horrek hitzordua, Zabalotegi aretoan.
Kontzertu horretan, ikasleek, diploma hartu ahala, ikasturtean zehar landutako obraren bat joko dute, batzuen kasuan bakarka, beste batzuetan bikoteka. Taldeka joko duen nor edo nor ere izango da.
Kontzertua amaitzerakoan, Bergarako Musika Eskolak luncha eskainiko die diplomak jaso dituzten ikasleei eta haien senitartekoei, Bergarako Musika Eskolako egoitzan.