Ekitaldia hasi baino ordu erdi lehenago osoko bilkuren aretoa jendez beteta zegoen. Ikusmin handia zegoen, nahiz eta hauteskundeetako datuek Jesus Elortza alkate izango zela ziurtatu.
Adin mahaia eratu ostean zinegotzi guztiek kargua onartu dute. Udaletxeko idazkariak horrela galdetuta hiru alkategai agertu dira. Jesus Elortza (Bildu), Aintzane Oyarbide (EAJ) eta Mari Carmen Barrenetxea (PSE-EE). Oyarbidek 5 bozka lortu ditu, Mari Carmenek bakarra eta Elortzak 11 bozka. Bilduko hautagaiak bere alderdiko bozkez gainera, gobernua eratuko duen Aralarrenak ere jaso ditu-eta.
Alkate berriaren lehen hitzak
Jesus Elortzak parte hartze hitza behin baino gehiagotan aipatu du. Udala eta herriaren elkarlana areagotu nahi duela azpimarratzean. “Elkarrizketarako irekia” dagoen udal bat eratu nahi duela gaineratu du alkate berriak. Etorkizuneko ideiak aurkeztu baino lehen, Elortzak “eredutzat” izango dituen hiru alkate aipatu ditu, Monzón, Elko eta Barruso. Ondoren, oso hunkituta zegoen Agurne Barrusok agintea irudikatzen zuen uztai bat eman dio Elortzari, bilkuran zegoen jendearen txaloen artean.
Ekitaldia bukatu bezain laster, udalbatza zaharrari omenaldia egin diote San Martin plazan. Bertan, ia negarrari eutsi ezin zion, Agurne Barrusok, eskerrak eman nahi izan dizkio “bere ondoan” izan duen Bergarari.