Asteleheneko ohiko osoko bilkuran hainbat kale berriren izenak onartu zituen aho batez udalbatzak.
Alde batetik, Ugarte kalea zatitzean kale berria sortuko da San Lorentzo aldean egiten diharduten etxegunean. Beste aldetik, Larramendi industriagunean kale nagusi bat eta beste zortzi zeharkale sortu dira.
Ernai taldea gogoan
Ugarte zatitzean sortuko den kale berriari Ernai kalea izena jarriko diote. Ernai 60. hamarkadan euskarazko antzerkigintzan jardun zuen herriko talde baten izena da. 1965. urtean hasi ziren lanean eta gorabehera batzuk tarteko, jarraipenik ez izatean, 1972an desegin egin zen. Ernaikoek ospe handia lortu zuten, eta Euskal Herriko herri ugaritan antzeztu zituzten euren lanak.
Larramendi industriaguneari dagokionez, kale nagusiari Larramendi izena jarri diote. Zeharkaleei: Errementari, Hargin, Errotari, Ehule, Ikazkin, Labanagile, Jostun eta Arotz.