50 ume inguru igo ziren taula gainera, eta ikusle dezente erakarri zituzten. Hala, ordubete inguru iraun zuen ekitaldian zehar, ikasleek era askotariko ikuskizunak eskaini zituzten. Bertso eskolakoek bertsoak abestu zituzten, eta trikiti eskolakoek, euren aldetik, hainbat pieza jo zituzten txandaka. Dantzariek ere izan zuten euren txokoa egubakoitzean: lehenengo txikienak irten ziren, gero nagusienak, eta bukatzeko, denek batera ikurrin dantza dantzatu zuten. Giro polita jarri zuten denek ere plazan.
Gauean, Ain_1
Arratsaldean neska-mutikoen txanda izan bazen, gauean Ain_1 taldea izan zen agertokira igo zena. Arrasateko taldeak, hain berezi egiten duen poesiez, dantzez eta musikaz osatutako emanaldia eskaini zuen, eta arrakastatsu ibili ziren. Horren adibide da plazatik igarotzen zirenen arreta piztea lortu zutela, eta azkenean, plaza bera jendez bete zela. Ikasturte amaierako jaialdia izanda, balorazioen txanda ere izan zen. Jarduneko kultura koordinatzaile Maitane Arizabaletaren esanetan, balorazio oso positiboa egiten dute.