Urbano zerbitzua ustiatzeko baldintzak onartu zituen udalbatzak ahoz batez, asteleheneko osoko bilkuran eta orain lehiaketara aterako dituzte.
Baldintzon arabera, oinarrizko bi linea zirkular egongo dira erdigunea lotuko dutenak puntu hauekin: Ibarra kalea, Ozaeta, Zubiaurre, Bolu, San Lorentzo, Amillaga eta Matxiategi. Berrikuntza Bolu izango da, orain arte ez zen eta zerbitzua haraino iristen –ziburuen ondoko biribilgunean geratuko da–. Linea bakoitzak 20tik gora geldialdi egingo ditu.
Astelehenetik domekara
Maiztasuna areagotu egingo da. Lanegunetan, astelehenetik egubakoitzera, urte osoan –abuztuan izan ezik– 07:00etatik 21:0etara izango da zerbitzua, eta kadentzia 20 minutukoa. Zapatuetan, 09:00etatik 14:00etara eta 17:00etatik 21:00etara egongo da zerbitzua, 40 minuturo. Eta domeka eta jai egunetan, 10:00etatik 14:00etara eta 17:00etatik 21:00etara, 40 minuturo. Prezioari dagokionez, bidaia batek 1,10 euro balioko ditu eta 10 bidaiako bonuak, berriz, 6 euro.
Zerbitzua emateko hiru ibilgailu berri egongo dira –bi zirkulatzen eta bat erreserban– eta irisgarritasun baldintzak beteko dituzte.