Sozialistak, popularrak eta Bildu koalizioa izan ziren jeltzaleen jomuga.
Urkulluk, PPk eta PSE-EEk foru aldundietan eta udal nagusietan egin dezaketen balizko akordioaz ohartarazi zuen, "Euskadiren diluzioa bilatzen duelako". Eta, hauteskundeetan, bi aukera zeudela esan zuen: PP eta PSE-EErena edo EAJ.
Markel Olanok ere sozialista eta popularrek egin dezaketen paktuez egin zuen berba. Eta esan zuen "bi muturren" artean, hau da, ezker abertzalearen eta "PP-PSE-EEren artean", "erdiko bidea" zegoela: EAJrena.
Korapiloz betea
Egibarrek esan zien alderdikideei hurrengo maiatzaren 22a, hauteskunde eguna, "ospakizun eguna" izan behar dela eta ez "aieneka" aritzekoa. Eta, Bilduren gainean esan zuen, ari mataza (Bilduk darabilen irudia), benetan, "korapiloz betea" zegoela.
Bergara geldi
Aintzane Oiarbidek esan zuen duela lau urte "trikimailutan" aritu zirela ezker abertzalea eta sozialistak, EAE Udal hauteskundeetan presente egon zedin herri batzuetan bai eta beste batzuetan ez. Eta esan zuen, harrezkero, "Bergara geldi" egon dela "ezker abertzaleak gobernatu duelako".