Bestalde, elkartasun proiektuetarako sinadurak batzen ari direla aitzakia bezala hartuta, dirua lapurtzen dabiltza azken hilabetean Arrasaten, Bergaran eta Oñatin.
Bergarako udaltzain buru Alfonso Alonsok azaldu du lapurrak etxeetara joaten direla esaten umeak adoptatzeko, herrialde txiroetan ikastetxeak eraikitzeko edo bestelako elkartasun proiektuak aurrera ateratzeko sinadurak batzen ari direla. Sinatu ostean, NAN zenbakia eskatzen dute; gehienek buruz badakite ere, banako batzuk daude karneta begiratu beharra izaten dutenak, bereziki pertsona nagusiak. Diru-zorroa ateratzean aprobetxatzen dute lapurtzeko.
Horren aurrean, Alfonsok gomendatu du horrelako kanpaina baten alde sinadura eskatzen joaten diren bakoitzean, udaltzaingoarekin harremanetan jartzeko, kanpainaren egiazkotasuna konfirmatze aldera.
