The Riff Truckers 2005ean sortutako rock-and-roll taldea da. Bluesa eta countrya nahasten dituzte euren kontzertuetan bizkaitarrek; eta, whiskia lagun izaten dute. On route izeneko disko berriko abestiak aurkeztuko dituzte bihar.
Bilbo Hiria pop-rock saria
The Riff Truckers 2010eko Bilbo Hiria pop-rock lehiaketako irabazleak izan ziren. Batez ere jarrera nabarmentzen dute adituek taldeari erreferentzia egiterakoan. Jarrera eta teknika ona dituzte taldekideek oholtzaren gainean. Zuzeneko bortitzak eskaintzen dituzte, inor axolagabe uzten ez duten horietakoak.
2009ko udaberrian Muxikako Muxik-On estudioan On route diskoa grabatu zuten bizkaitarrek. Zortzi abestiz osatutako diskoa da, autoekoiztua, eta, oraingoz, Gernikako tabernetan, kontzertuetan eta Internetez taldearen webgunean eros daiteke.
Sarkor gernikarrak
Sentimendu gabe diskoa aurkeztuko dute gernikarrek bihar gaztetxean. Hamar abestiz osatutako diskoa da; disko landua, serioa eta zuzena da. Muxikako Muxik-On estudioan grabatu zituzten abestiak, eta iaz uztailean argitaratu zuten lana. Diskoaren aurretik bi maketa argitaratu zituzten gernikarrek.