Zapatuan, Kuxi Gallastegi beterano mailan, eta Josu Mentxaka seniorretan, sailkapenetik kanpo geratu ziren. Domekan, berriz, finalerdietara sailkatzeko lehenengo txandan Antxon Etxabek (senior), Iñaki Usabiagak (gazte) eta Jokin Labaienek (kadete) agur esan zioten txapelketari.
Bigarren txandan, finalistek zeukatena eman zuten. Aritz Gimbert bederatzigarren sailkatu zen, Patxi Ugalde bosgarren sailkatu zen –epaileak hartutako erabaki txar baten ondorioz bi segundoko zigorra jaso zuen, podiumera igotzeko aukerak galduaz. Eta, kadete mailan Beñat Lizarraldek jaitsiera ona egin eta podiumera igo zen, zilarrezko domina irabazita.
Beti-Bustikoendako hurrengo hitzordua oraingo zapatuan izango da, Hernanin izango dute-eta Gipuzkoako txapelketarako proba baliagarria.