Irakasleek goizean goiz ekin zioten lanari, hormetan marrazkiak egiteari; eta margolari gazteak heldu zirenean, 10:00ak inguruan, horiek koloreztatzen hasi ziren. Irakasleek aitortu ziguten eskaera honek lan handia suposatzen duela eurentzako, baina interesgarria dela aldi berean, esperimentatzeko aukera ematen dielako. Tailerrean, gainera, marrazketa egiten dute eta olio pintura erabiltzen dute koadroak pintatzeko; Txiki-txokoko hormetan, aldiz, akrilikoa erabili dute, eta hori metodo berria da eurentzat.
Profesionalen moduan
Mantala soinean eta pintzela eskuetan, txukun egin zuten lan Bergarako artista gazteek. Itxura berriarekin, Txiki-txokoa lehen baino askoz ere politagoa izango dela zioten eta harro daudela egiten ari diren lanarekin. Eurei esker, Zabalotegiko eskola zaharreko erabiltzaileei mundu berri bat zabalduko zaie eta lagun berrien konpainia izango dute aurrerantzean.
Zapatuan fin aritzea ez zen nahikoa izan, ordea, lan dena bukatzeko, eta zapatu honetan –apirilak 9– bigarren saio bat egin beharko dute. Horrek ez die beldurrik ematen, baina; are gehiago, gustura joango dira, paretak margotzeko aukera ez baitute egunero izaten!