Ariznoa gimnasia elkartetik maila bakoitzeko talde bana arituko da. Banaka, berriz, Mariana Nunes (alebina), Jone Olabarria eta Sonia Gonzalez (infantilak), Ane Miren Muguruza eta Jennifer Pineda (kadeteak) eta Kristina Etxeberria (jubenila) izango ditugu partaideen artean. Aurreko fasea Arrasaten jokatu zen otsailaren 5ean eta bergararrek emaitza aipagarriak lortu zituzten han.
Gaur egun 125 neskatila ari dira Ariznoa gimnasia erritmikoko taldean. Lau urtetik 24 urtera bitarteko gimnastak dira eta Sonia Corredera eta Ane Susaeta eibartarrak dira haien entrenatzaileak.
Arrasaten, apirilaren 9an
Bergarako txapelketaren ondoren, hurrengo larunbatean, apirilaren 9an, Arrasateko Uarkapen, Gipuzkoako Eskolarteko B mailako txapelketa jokatuko da, goizeko jardunaldian. Bertan arituko dira Ariznoa elkarteko alebin mailako bi talde. Arratsaldean benjamin mailako gimnasten txanda izango da. Aurreko saioa Bergaran egin zuten, otsailean.