Aratusteetako kontzertua Udal Musika Bandaren hiru piezarekin hasi zen eta ondoren Orkestra Sinfonikoak beste bi jo zituen. Musikaren ostean etorri zen antzerkia eta urtero moduan herritar asko eta aurpegi ezagun asko ikusi ziren aktore lanetan.
Magali Muruamendiarazi indarra eta elkartasuna
Ez da ahaztu behar Bergarako Aratusteetako kontzertuak helburu solidarioa izaten duela. Aurten kontzertuan batutako dirua Magali Muruamendiaraz neskatilarendako izan da. Burmuinean kalteak ditu eta Galiziako osasun zentro batean dago tratamendu berezia jasotzen. Bada atzo txalo zaparrada itzela jaso zuen Magali Muruamendiarazek. Antzerkian gidari lanetan ibili zen Manu Diazek besarkada handi bat eta indarra bidali nahi izan zizkion Magaliri Bergarako frontoitik.
Xabier Lete ere gogoan
Xabier Lete abeslaria ere gogoan izan zuten atzoko kontzertuan eta amaieran Xalbadoren heriotza jo zuten Udal Musika Bandak eta Orkesta Sinfonikoak. Pilotaleku osoak elkarrekin abestu zuen Leteren abesti ezaguna eta ikusleek hala eskatuta errepikatu egin behar izan zuten.