Osakidetza gaixo dago; nola zainduko du bada gure osasuna?. Larrialdiak ez itxi. Urtebete borrokan. Alarma Osakidetzari ez zaizkio ez erabiltzaileak eta ezta langileak inporta ere.
Era horretako protesta kartelek betetzen dute Bergarako anbulatorioa. Larrialdi zerbitzuetako langileen protestaren adierazle dira, eta datozen hiru asteotan, asteka txandakatuz, protesta-greba horrekin jardungo dute, larrialdi zerbitzuen egoera salatzeko.
"Ezer negoziatu gabe"
"Osakidetzako Zuzendaritzak aurrera jarraitzen du bere murrizketa eta osasun kalitatea gutxitzen dituen politikarekin: larunbatetan anbulatorioak itxi eta pediatra kentzen du, larrialdietako zentroak ixten ditu, ordutegiak gutxitzen ditu… Beti isilpean, ezer negoziatu gabe eta inposizio latza erabiliz", salatu dute.
Lan-baldintzak okerrera
"PACetan gabiltzan langileon lan-baldintzak okerrera egin dute nabarmen Osakidetzak hartutako neurri hauekin (lanpostu gutxiago, ordutegi jasanezinak, soldaten murrizketak…) Osakidetzako goi-karguen soldatak, alderantziz, %12ra igo dira!", gaineratu dute.
Kexu-orriak
Bada horren guztiaren berri emango diete datozen egunotan larrialdi zerbitzuetako erabiltzaileei eta haien laguntza ere eskatu dute: "Jakinarazi Osakidetzari kexu zaudela. Bete horretarako prestatu ditugun kexu-orriak".