Chirlaque, aitonaren paperean
Alfredo Gonzalez Chirlaque Udal Musika Bandako zuzendariak azaldu du musikariak garaiko erara jantziko direla, eta protagonistak "baserritarrak eta kaletarrak" izango direla. Gonzalez Chirlaquek, adibidez, bere aitonaren papera beteko du gaurko kontzertuan. Jakin dute orain dela 100 urte Mahasterrekan, orain Pertxa elkartea dagoen tokian, sagardotegi bat zegoela. Hala, gaurko jaialdirako egin duten dekorazioa izango da sagardotegietan oinarritua. Bergarako Pilpira taldekoek egin dute dekorazioa.
Sorpresaz betetako gaua
Kontzertuak bi zati izango ditu. Lehenengo zatian Udal Musika Bandak hiru pieza joko ditu: Euskal festara, Procession of the Sorcerers eta Pinocchio. Ondoren, Bergarako Orkestra Sinfonikoak La italiana en Argel eta La vida es bella lanak eskainiko ditu. Bigarren zatia sorpresa izango dela azaldu du Gonzalez Chirlaque zuzendariak.
Kontzertuan jasotako dirua Magali Muruamendiaraz 5 urteko neskatilari laguntzeko izango da. Magali Galizian dago tratamendua jasotzen.