"Gaixoei berdin-berdin egingo diegu arreta. Gu garenez zerbitzu minimoak, berdin-berdin egin behar dugu lan, ezin dugu anbulatorioa itxi. Egingo duguna da anbulatorioan bertan informazioa ipini eta gaixoei informazioa eman", jakinarazi du Josune Oregik, larrialdietako medikuetako batek.
Pediatria ere bai
Eta protestaren bitartez adieraziko dutena da ez daudela ados Osakidetzaren zuzendaritzarekin: "Joan den ekainean anbulatorio batzuk itxi egin zituzten asteburuetan, Oñati, Arrasate, Aretxabaleta eta Eskoriatzakoak, besteak beste. Ondorioz, herri horietako gaixoak ospitalera joaten dira, eta beste batzuk hona datoz. Horrez gainera, lehen eguneko medikuek ematen zuten asteburu goizeko zerbitzua, eta orain guk, larrialdietakook eman behar izaten dugu zerbitzu hori; eta gainera, asteburuko pediatria zerbitzua ere eman behar izaten dugu, eta gu ez gara pediatrak".
Gipuzkoan, 185 langile greban
Bergarako anbulatorioko larrialdi zerbitzuan lanean diharduten 12 langileek egingo dute bat protesta horrekin, Gipuzkoako larrialdietako zerbitzuetako gainerako 185 langileekin batera. Gainera, euren asmoa da aste batean greba egitea, hurrengoan lan, hurrengoan greba… eta horrela bost astean jardutea.
Joan den astean hasi ziren dagoeneko protestan, itxialdia egin zuten-eta Gipuzkoako larrialdietakoek Elgoibarko anbulatorioan.
Bergaran, 12 lagun greban
Bergarako kasuan launa medikuk, erizainek eta zaindarik egiten dute lan anbulatorioko larrialdietan. Hiru pertsonako lau txanda egiten dituzte: astelehenetik egubakoitzera 17:00etatik 08:00etara eta zapatu eta domeketan 24 ordu.