ELAko Arcelorreko ordezkari Xabier Garitanok esan digunez, Bergarako langileek "prentsan agertu dena" bakarrik dakite enpresa zuzendaritzaren asmoen gainean. Egubakoitzean batzartuko dira enpresa-komiteko kideak arduradunengana jotzeko (azken horiek Zumarragan daude).
Baina eurek lehengo bezala jarraitzen dute: "Oraingo hileko orduak betetzeko adina lan badaukagu, baina datorren hilean zer gertatuko den ez dakigu". Garitanok gaineratzen du abenduan bukatu zela lehenengo EREa, eta enpresak ekainera arte luzatzea eskatu zuela. "Horrek esan nahi du gauzak ez doazela nahi adina ondo", esaten du ELAko ordezkariak.
Lehen bezala jarraitzen dute
Bergarako altzairu-labea itxita dago. Gipuzkoan beste bi labe ditu Arcelorrek, Zumarragakoa eta Beasaingoa. "Gipuzkoan bi izanda, momentu honetan bat soberan daukate. Esan ziguten aldi baterako itxiko zutela, baina guk ez dugu sinisten aldi baterako denik", esaten du Xabier Garitanok. 2009az geroztik dago labea itxita.
Bergaran, Zumarragan eta Beasainen 222 langile daude. Bergarako sei langile Beasaingo lantaldean sartu dira azkenaldian. Bestalde, Bergarako hainbat langile Zumarragara eraman zituen enpresak, eta horrela jarraitzen dute. Bergaran laminazio lanak bakarrik egiten dira. Bestalde, azken urtean 60 urte bete zituzten pare bat langileri aurre-erretiroa eskaini zien enpresak, eta onartu egin dute.