Hainbat daturekin laburtu daiteke gaurko partidua: Oiartzunek 10 gol jasota zituen orain arteko 17 jardunaldietan. Bergarak lau egin dizkio 45 minututan. Lau horietatik hiru Iñigo Machok sartu ditu. Esan beharrik ez dago lehen zatian bukatu dela partidua. Bergarak zortzi partidu darama galtzeke. Horrez gain, 623 minutu egin ditu honez gero golik jaso gabe. Mondrak egin zion azkena, azaroaren 27an. Seigarren postuan dago Bergara eta ligako partidurik onenetakoa egin dute gaur Oskar Maiztegiren mutilek. Gauzak horrela, pozik etxeratu dira Agorrosinen batutako zale bergararrak.
Zaila da jokalari bat edo beste nabarmentzea baina Macho golegilearen lanaz gain, erasoan Ilzarbek eta Crespok lan aparta egin dute. Machoren lehenbizko bi goletan erabakigarria izan da haien ekarpena. Atzean zein erdialdean ere sendo ibili dira etxekoak. Taldearen azken partiduei erreparatuta, argi dago gorako bidean dela Bergara.
Esan bezala, bigarren zatian soberan geratu da. Partidu lasaia izan arren, zortzi txartel atera ditu epaileak. 7 euro ordaindu behar dute taldeek txartel bakoitzeko. Federazioaren zerga, egoera ekonomiko larrian diren taldeei mina egiteko modua.
Bergara: Lopez, Oregi (Elorriaga, 75. min.), Arruti (Garitano, 77), Arazkonaga, Nafarrate, Agirre, Crespo, Balzategi (Igartua, 63), Macho (Ibañez, 60), Ilzarbe eta Cabanillas (Navas, 56).
Oiartzun: Olaziregi, Gorka (Bereziartua, 46), Josu, Loperena (Boada), Beñat, Enekoitz, Endika, Urtzi (Unai, 46), Aritz (Josu, 51), Eñaut eta Jon.
Bestelakoak: Matellanes epailea, Tejero eta Carasa marrazainen laguntzarekin. Oiartzungo lau jokalariri atera zien txartel horia eta etxekoen partetik Oregi, Arruti eta Ilzarberi. 200 ikusle inguru Agorrosinen. Giro atsegina. Golak: 1-0 Macho (min. 5). 2-0 Agirre (min. 30). 3-0 Macho (min.37). 4-0 Macho (min. 41).