Intentsitatez betetako partidua jokatu zuten atzo Soraluce BKE eta Askartzak Labegaraietan. Talde bizkaitarra etxeko taldea baino hobeto sartu zen norgehiagokan eta lehen zatiko erdialdera arte hiru tantoko aldea mantendu zuen etxeko taldearen aurrean. Baina lehen zatiko bigarren partean suspertu egin ziren mahoneroak eta lehen zatia aurretik amaitzea lortu zuten (17-16). Bigarren zatian ondo irten ziren bergararrak eta lehiako azken txanpara arte aurretik izan ziren markagailuan (19-17/ 21-19 / 25-23), baina azken hamar minutuetan Askartzak, taldeko jokalari onenak kantxan zituela, emaitzari buelta ematea lortu zuen eta aurretik jartzea ere lortu zuten. Azken minutua emozioz betetakoa izan zen; etxeko taldea aurretik zela (33-32), azken segunduetan berdintzea lortu zuten bizkaitarrek. Azken emaitza, 33-33.
Josetxo Muniategi Soraluce Bergara taldeko entrenatzailea pozik zegoen taldearen lanarekin: "Defentsan ondo aritu gara eta erasoan oso bizkor ibili gara, orain arteko partidurik bizkorrena egin dugula esango nuke". Urtea hasteko bigarren sailkatuaren aurka berdinketa lortzea ez dago batere txarto. Datorren astean liderraren aurka lehiatuko dira, emozioz josita datorren derbian: Arrasateko Ford Mugarri taldearen aurka neurtuko dituzte indarrak.
Partiduaren gaineko kronika osoa, argazkiak eta Josetxo Muniategi entrenatzaileari elkarrizketa asteleheneko Goiena paperean izango duzue irakurtzeko aukera.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak
