Bi taldeen arteko aldea nabaritu zen Ipintzan, eta partiduaren zati handiena bergararren zelai zatian jokatu zen. Reala baloiaren jabe eta erasoan, eta Bergara defentsako lanean. Dena dela, ondo eutsi zuten debagoiendarrek Donostiako taldea, eta aurreneko zatia hutsean amaitu zen.
Eta bigarrenean markagailuan aurretik jartzeko aukera izan zuten gainera, baina etxekoek aukera garbia egin zuten huts eta hurrengo jokaldian partiduko aurreneko gola egin zuen Realak. Gero, 2 eta 0ekoarekin, erabakita geratu zen norgehiagoka: bigarren gol hori, gainera, Meho Kodro Realeko aurrelari handia izandakoaren semeak egin zuen, falta bat buruz bikain errematatuta.
Aretxabaleta eta Eibarren arteko gaurko bigarren finalerdiaren ostean, Bergarako gazte mailako txapelketaren finala bihar jokatuko da, arratsaldeko 16:00etan Agorrosinen.