Udal Musika Bandak Jacob de Haan konposatzailearen Virginia obrarekin ireki zuen kontzertua. Abesbatzen txanda etorri zen gero. Imanol Urzelairen zuzendaritzapean Aritzeta abesbatzak Barcarola, Neskatx ederra, Segalariak eta Alleluia abestiak kantatu zituzten. Bergarako Orfeoiaren txanda etorri zen ondoren; Goizeko euri artean, Superstar eta Your Song kantuen ostean orfeoikoek beltz espiritual bat aukeratu zuten emanaldia ixteko: Hail Holy Queen.
Kontzertua amaitzeko, urtero moduan guztiak elkarrekin aritu ziren Orkesta Sinfonikoarekin batera. Alfredo Gonzalez Chirlaque zuzendariak Avatar filmaren soinu banda aukera zuen aurtengo kontzertua bukatzeko. Amaiera ezin hobea, zirraragarria izan zen eta Ainara Ortega bakarlariaren ahotsak, momentu batean, beste mundu batera eroan zituen pilotalekuko ikusleak.
Gonzalez Chirlaquek egindako James Hornen konposatzailearen obraren moldaketa lehen aldiz entzuteko aukera izan zen zapatuan Bergaran. Avatar abestia amaitu ostean txalo zaparrada amaiezina izan zen.
Ohitura den moduan Gabonetako kontzertua Hator Hator eta Adeste Fideles abestiekin amaitu zuten.