Egindako diagnostikoa herritar eta eragile sozialei aurkeztuko diete datozen asteetan, iritziak jaso eta hurrengo urratsak prestatzeko: herri programa zehaztu eta udal hauteskundeetarako hautagai zerrenda osatu.
Zapatuan, giza katea
Bestalde, zapaturako, hilak 18, mobilizazio "irudimentsu" batean parte hartzeko deia luzatu dute: "12:30ean frontoian hasita eta herriko gune garrantzitsuetan barrena, giza kate jendetsua egingo dugu, historikoak izan diren uneak eta pertsonaiak gogoratuz –Jose Luis Elkoro eta alkateen mugimendua, Telesforo Monzon eta Olaso dorrea–, hitzez, kantuz eta bertsoz lagunduta". "Legeztatzea lortzeko, alderdi politiko berriaren estatutuak aurkeztuko ditugu hurrengo asteotan Madrilen. Baina Madrilek ez du ezer oparitzen, Euskal Herriak lortu behar du ezker abertzalearen legeztatzea; egoeraz jabetu eta arduraz jokatzeko garaia da", gaineratu dute.