Bai Batzokiak kudeatuta
Bai Batzokia enpresari utzi dio Bergarako EAJk herriko batzokiko taberna eta jatetxea kudeatzeko ardura. Bai Batzokia enpresan batzen dira Bizkaia eta Gipuzkoako hainbat batzoki, frankizia moduan; besteak beste, Zarautz, Beasain, Azkoitia, Eibar edo Durangokoak.
Bergarako batzokian ariko dira Jose Luis Lizartzaburu Mutrikuko Ametza tabernakoa eta Pablo Donofrio Mutrikuko Ormazabal jatetxean sukaldari ibilitakoa.
Lapikotxoak, menua eta karta
Tabernaz gain, bi jangela izango ditu Bergarako batzokiak. Bata, 20-25 bat lagunendako eta bestea 70 bat lagunendako. Eguneko menua eskainiko dute egunero, 13,50 eurotan (ardo onduarekin). Asteburuetan, ostera, menu berezia, 30 eurotan. Karta ere eskainiko dute. Eta, horretaz gain, pintxoak eta kazolatxoak ere bai: tripakiak, muturrak, bakailaoa, albondigak… Jangela txikian, kirol saioak-eta ikusi ahal izango dira lagun artean. Bestalde, txokolatea eta txurroak ere emateko asmoa dute arratsaldeetan.
Bergarako batzokiko arduradun berriak ostalaritzan eskarmentu handikoak dira eta, mutrikuarrak izanda, itsaskiekin prestatutako platerak eskainiko dituzte: Mutrikuko txibiak, Ondarroako legatza, itsasapoa, mendrezkak…
Batzokia egunero irekiko dute 07:30ean, gosariak-eta emateko, eta gauera arte egongo da zabalik. Zapatu eta domeketan, 10:00etan irekiko dute.