Azken hiru asteotan, herriko kaleetan Auzoko izena zeramaten hainbat kartel azaldu dira. Kartelotan, besteak beste, herrian berba egiten diren hizkuntzen izenak azaldu dira eta baita hizkuntzok zein herrialdetan berba egiten diren ere. Hori guztia Jardun elkarteak eta Topaguneak egin dute –Udalaren laguntzarekin– Auzoko egitasmoaren baitako "moskeo kanpaina moduan", antolatzaileek azaldu dutenez.
Hain justu ere, Auzoko egitasmoa azaltzeko bidean lehen urratsa izan da, eta "orain, Auzoko zer den eta herritarren aurrean aurkezteko garaia iritsi zaigu", esan dute antolatzaileek. Hain zuzen ere, bhar, hilak 24, egingo dute herritarren aurreko aurkezpen hori, 19:00etan, kultura etxeko ganbaran.
Lehen urratsak emanda
Badira aste batzuk herrian Auzoko egitasmoari ekin ziotela. Euskararen eremuetara datozen etorri berriei hizkuntzaren ikuspegitik egin beharreko harrera egituratzea du helburu. Eta dagoneko sei bat laguneko taldeak badihardu horretan. Taldean batu dira senegaldarrak, pakistandarrak, kubatarrak, bergararrak... Elkarrengandik ikasteko prest daude, betiere, euskara komunikazio ardatz izanda.