Zakarrak, kaka eta plastikozko mahai bat eta aulkiak, uretan. Egoera horretan aurkitu dute igerilekua sorosleek, 10:00etan, irekitzera joan direnean. Ateak zabaldu beharrean, "itxita" zihoen karteltxoa zintzilikatu eta garbitze lanei ekin diete: ageriko zakarra erretiratu, ur hondoa makina xurgatzaile batekin pasa, ura berriztu, kloro eta azido mailak egokitu... Zazpi bat ordu behar izan dituzte dena egiteko eta, prozesuak iraun duen denboran, erabiltzaileek ezin izan dute kanpoko igerilekuan bainurik hartu; berdegunea, barruko igerilekuak eta kanpoko aldagelak baino ezin izan dituzte erabili.
Agorrosingo gerenteak igorritako informazioaren arabera, badirudi gazte koadrila bat izan da gauean triskantzak egin dituena. Gertatu denari buruz galdetuta, erabiltzaileak, oro har, bat etorri dira esaterakoan horrelako ekintzekin bergararrei egiten zaiela kalte eta herriko azpiegiturak zaindu egin behar direla.