Zabaleta arerio barik Gorlan, Vilariñok istripua izan ondoren

Entrenamendu saioko igoeran, Ander Vilariñok istripua izan zuen. Bideko zulo baten autoaren kontrola galdu zuen eta bide bazterrean aparkatuta zeuden bi auto jo ondoren, bide-seinale bat apurtu zuen, eta Arana Goikoa baserriaren ondoan geratu zen. Berehala, istripu lekura, Gurutze Gorriko bi anbulantzia, eta DYAko Erreskate Unitatea iritsi ziren. Vilariñoren Reynard F3000 autoa txikitu egin zuten gidaria ateratzeko. Anbulantzia medikalizatu batek Hondarribiako gidaria Debagoienako ospitalera eraman zuen, eta han, femurra apurtuta zuela ikusi zuten. Hala, aurkari indartsuena igoeratik kanpo, Aitor Zabaleta bergararra izan zen azkarrena Gorlako igoeran.