Unedeko egoitza egokitzeko lanak uztail hasieran hasiko dira. Halaxe jakinarazi du Juanjo Alvarez zentroko zuzendariak. Eskolarik ez dagoela aprobetxatu eta ahalik eta lan gehienak opor garaian egin nahi dituzte, urrian berriz ikasturteari ekin ahal izateko, nahiz eta ordurako lan guztiak bukatuta egongo ez diren.
Hori horrela, Alvarezek gehitu du prestakizun tekniko guztiak martxan daudela, lanak ahalik eta azkarren hasteko; "proiektua asteon aurkeztu dugu Udaleko bulego teknikoan eta lanak esleitzear daude", gehitu du
Teilatua, lan nagusia
Eraikinaren egiturari dagokionez, teilatu osoa konponduko dute –ez soilik Unedi dagokion teilatu zatia– eta baita teilatupea egonkortu ere. Alvarezen esanetan, gainera, egoera kaskarrean dago eta berehalako konponketa behar du.
Horrez gain, igogailua jarriko dute eraikin barruan; fatxada eraberrituko dute–garbitu eta egonkortu egingo dute beharrezkoa den lekuetan zatitxorik erori ez dadin–; eraikin guztiko leihoen itxiturak berrituko dituzte eta komunak ere berriak egingo dituzte. Lanon hasierako aurrekontua da 1,8 milioi euro ingurukoa –BEZ barne.
PP, permutaren alde
PP alderdiak bat egin du Batzar Nagusietan jaso den Arrizuriaga-Seminarioa trukerako proposamenarekin. Iñigo Arkauz PPko batzarkideak erredakziora bidalitako oharrean dio: "Proposamenak aurrera egingo ez balu, Unedendako kaltegarria izango litzateke, baina baita Bergara eta Gipuzkoarendako ere, unibertsitateak herria laga ahal izango lukeelako".
Horrekin batera, uste du Arrizuriagan Unedek egoki handitzeko aukera izango lukeela eta gainera, parkea herriarendako berreskuratzea ekarriko lukeela. Bestalde dio: "Seminarioa herri erdian dago eta leku egoki eta estrategikoa da Udal liburutegia egiteko eta baita kulturarako instalakuntzak ere. Eta hori gutxi balitz, Aranzadirendako irtenbidea ere izango litzateke, Seminarioan jarraituko lukeelako, baina hobetutako instalakuntzetan".