Ordenantza fiskalak onartu zituztenetik Bergaran uraren kontsumoa neurtzeko irizpide berriak ipini dituzte martxan eta uraren gastua kontsumoaren araberakoa da orain. Aldaketa horiek direla-eta, gaizki ulertu batzuk egon dira kontadoreen irakurketetan eta ondorioz fakturetan.
Bergarako Udalak faktura horiek aztertzeko eta itzuli beharreko dirua itzultzeko eskatu dio Ur Partzuergoari, eta honek arazoa konpondu eta familia bakoitzari zor zaiona itzultzeko konpromisoa hartu du.
Dena dela, udalak herritarrei gertatutakoa azaldu nahi die. Horretarako bilera egingo dute datorren martitzenean, apirilaren 15ean, arratsaldeko zazpietan Bergarako pleno aretoan. Agurne Barruso alkateak azaldu du, bide batez, uraren kontsumoa neurtzeko martxan dauden irizpide berriak ere azalduko dizkietela herritarrei.