Besarkada solidarioa
Elkartasun proiektu horren helburua da haur horiei beste errealitate bat ezagutzeko aukera ematea.
Horrekin guztiarekin, oporrok izan nahi dute Bubisherreko kideen esanetan: "Neska-mutikoendako arnas bidea, errefuxiatuen kanpalekuetan bizi dituzten baldintza gogorrak kontuan izanda, eta horrekin batera, bi herrien arteko besarkada solidarioa".
Etxean, bi hilabetez
Harrera kanpaina bi hilabetekoa izango da aurten ere, uztailaren 10etik irailaren 10era, gutxi gorabehera; modu horretan neska-mutikoei eman nahi zaie aukera udako oporrak Aljeriako Tindufeko errefuxiatuen kanpalekuetatik kanpo pasatzeko.
Umeok 7 eta 12 urte bitartekoak dira; Tindufeko errefuxiatuen kanpalekuetan jaiotakoak dira eta bizi ere han bizi dira familiarekin. Erbestealdi luzea dihardute han, oso baldintza gogorretan: janari, osasun eta hezkuntza gabezia handiak dituzte eta udan, 50 graduko tenperatuta jasaten dute eta zero azpitik, neguan. Gainera, nazioarteko laguntza, oro har, gero eta eskasagoa dela aurreratu dute Bubisherreko kideek eta horrek are zailagoa egiten duela erbestealdia.