Ozio enpresak esan dio Udalari egiteke dauden lanak kopuru jakin baten truke egingo dituela; Udalak obra zuzendariari pasa dio proposamen hori eta hark esan du diru gutxiagorekin egin daitezkeela lan horiek. Izan ere, Oziok proposatutako diru kopurua, hasierako aurrekontua baino handiagoa da, eta obra zuzendariari kasu eginez, Udalak erabaki du eskaintza baztertzea.
Adjudikazioa
Erabaki horrekin batera, egiteke gelditu diren lanak berriro adjudikatzea ere pentsatu du Udalak, eta premiazko bidea jarraituko du horretarako. Ahalik eta lasterren ordainduko dio Ozio enpresari orain arte egindako lanengatik eta, lanak likidatu ostean, premiazko adjudikazioa egiteko bidea hartuko dute: baldintzen pleguak idatzi eta lehiaketa publikoa deitu.
Pare bat hilabete geldi
Premiazko bideak jarraitu arren, prozesuak epe jakin batzuk bete behar ditu, ordea, eta, beraz, hilabete pare bat pasako dira Domingo Irala kaleko lanak beste enpresa bati esleitu eta hura lanean hasi orduko. Atzerapenak atzerapen, Victoriano Gallastegi alkateak esan du enpresa berriari eskari zuzena egingo diotela galdutako denbora berreskuratzen saia daitezen.
Egiteko lana
Domingo Iralako lehen faseko lanak egiteko ardura zuen bere gain Lasarteko Ozio enpresak: Irizar kaletik Telefonicara bitarteko zatia altxatu behar zuen, 1,4 milioi euroko aurrekontuarekin. Enpresa eraikitzailearen beraren ordainketa etendura dela-eta, martxoaren hasieratik geldirik daude lanak, ordea.