EAEko Agurne Barrusok eta Aralarreko Mikel Etxanizek, bi alderdiek osatu duten udal gobernuaren akordioaren oinarriak eman dituzte prentsaren aurrean. Azaldu duten moduan, "Udal gardena eta publikoa" eraiki nahi dute, "informazio iraunkorra eta zehatza eskainiko diena bergararrei". Horrekin batera, "Udal irekia" nahi dute. Horretarako, Udala herritarrei eta herriko eragileei zabaltzeko helburua dute eta partehartzea bultzatuko dute, tresnak jartzeko borondatea eurena eginez.
Udala "demokratikoa eta aurrerakoia" izatea ere nahi dute alderdi biek eta konpromisoa hartu dute ikusmolde denak errespetatzeko eta berdintasunean, gizarte justizian eta ingurumenarekiko errespetuan oinarritutako politika egiteko. Baita, prozesu politikoaren, elkarrizketaren eta indarkeriazko adierazpenak desagertzearen alde lana egiteko ere.