25. urteurreneko kantua
Udaberriko kontzertuan oso ezagunak diren kantuak joko dituzte talde guztiek, baina bat berezia izango da: alegia, Bergarako Orkestra Sinfonikoko eta Udal Musika Bandako zuzendari Alfredo Gonzalezek 25. urteurrenerako konposatutako abestia. Bergarako futbol taldeko entrenatzaile Manu Diazek idatzi du letra. Musika Eskolako ikasleek eta Bergarako Orkestra Sinfonikoak bat egingo dute kantu berria abesteko. Horren aurretik musika eskolako martxa abestuko dute Alberto Laskurainen zuzendaritzapean. Bestalde, Mikel Laboaren Txoria txori kantuaren bertsioa egingo dute kontzertuan parte hartuko duten abesbatzek eta musika eskolako instrumentu taldeak. Alain Sanchok egin du Laboaren bertsioa.
Egitaraua
Egitarauaren arabera musika eskolako hainbat taldek hasiko dute kontzertua: hain zuzen ere, suzuki eta trikiti taldeek eta hasiberrien abesbatzak. Ondoren Gabero Abesbatza igoko da taula gainera. Txistu taldeak egingo duen saioaren ondoren, Alai musika taldeak, akordeoi orkestrak, Aritzeta abesbatzak, musika eskolako haurren abesbatzak eta orkestrak egingo dute euren emanaldia.
Udaberriko kontzertuko azken zatian Bergarako Orfeoiak, musika eskolako gazte bandak eta San Joxepe Abesbatzak abestuko dute.
Gonbidapena
"Kontzertu berezia izango da, eta herritar guztiak gonbidatu nahi ditugu. Emanaldiaren ondoren afaria egingo dugu, eta txartela erosita, nahi duen guztiak har dezake parte. Lan asko egin dugu kontzertua prestatzen eta emaitza ona izango dela espero dugu", esan digu Musika Eskolako zuzendari Marije Ugaldek.