Kataluniako Laitrum taldeak estreinatuko du aurten txotxongiloen mostra barikuan, 19:00etan, Bergarako San Martin plazan Capses izeneko ikuskizunarekin, emozioendako opari den lanarekin.
Haren ostean etorriko dira Kataluniako beste hiru talde, Galiziako bat, Gernikan bizi den Buenos Airesko talde bat eta Belgika eta Alemania-Errusiako beste talde bana. Guztien artean osatuko dute Helduendako Nazioarteko Txotxongiloan X. Mostra.
Kale eta aretoak eszenatoki
Zabalotegi aretoan, gaztetxean, San Martin eta Munibe plazetan eta oro har, kalean jardungo dute guztiek hiru egunean, euren eszenatoki bereziak “esperientziak elkartrukatzeko topaketa gune” bilakatu guran.
Bestalde, Aroztegi aretoan zabalik da antzerkian, zineman eta telebistan erabiltzeko Diego Damian Rinaldi argentinarrak urtetan landutako pieza mekanikoekin egindako erakusketa.
Bergarakoa, lehenengoa
Taun Taun Teatroa Taldea orain dela 21 urte hasi zen helduendako nazioarteko txotxongilo mostrak antolatzen, “Euskal Herriko eta Estatuko antzerki panoraman huts interesgarria bete” guran, izan ere, “Bergarakoa ikusle helduendako txotxongiloen Estatuko lehen mostra da”.
120 artista
Harrezkero bi urtetik behin bilakatzen du Bergara txotxongiloen elkargune; dagoeneko 120 artista eta konpainia baino gehiago pasa dira bertatik, tartean, Txina, Australia, Erresuma Batua, Alemania, Argentina edo Italiatik etorritakoak.