Tostoi eta Erreilenoen Kofradiak lau ohorezko kofrade berri ditu: Txintxurreta anai-arrebak –Felisa, Antxoni, Eusebio eta Florita–, ostalaritzan egindako lanarengatik; Jokin Etxaniz pilotari ohia eta Aspeko entrenatzailea, pilota munduan egiten dabilen lanarengatik; Galarreta Oinetako denda, 100 urte baino gehiago daramatzalako funtzionamenduan; eta Musika Eskola, 25 urteko ibilbideagatik. Gaur, domeka, jaso dute izendapena; pozik guztiek, batez ere,Txintxurretarrek, eurekin akordatu izanagatik. Hunkitu egin dira eta, eurekin, herritarrak.
10:00etan hasi dituzte 11. kapituluko ospakizunak. Pilotalekuan, kanpotik etorritako kofradiei ongi-etorria eman eta Moja Klarisen elizara egin dute, meza entzutera. Handik udaletxera kalejiran joan dira gero, eta han, leporaino betetako osoko bilkuren aretoan, ohorezko kofrade berriak izendatu dituzte. Musika Eskolako Kamara Orkestrak Vivaldiren Negua eta Udaberria piezak jo ditu. Eguerdian, 120 lagun inguru elkartu dira Lasa jatetxean egindako bazkarian.