Tirri Tarrakoek Argi-Beltz ikuskizuna ekarriko dute Pasai San Pedrokoek Bergarara. Tirri Tarraren urteurrena ospatzeko herriz herri egiten duten kontzertua da irailean eskainiko dutena pilotalekuan; fanfarreari laguntzen, Sotto Voce orkestra, Bergarako Orfeoia eta Aritzeta abesbatza ibiliko dira.
Bi lanetan oinarrituko dira
Tirri Tarra fanfafarreak 2006an atera zuen Argi-Beltz diskoa, eta, hain zuzen, disko horretan oinarrituko dira iraileko kontzertuan. "Argibeltz lanaz gain, orain grabatzen gabiltzan Internas maketa berriko lanak ere eskainiko ditugu", azaldu du Igor Carballo Tirri Tarrako kideak.
Tirri Tarrak haizea, perkusioa, teklatua eta beste hainbat musika tresna erabiltzen ditu; gainera, fanfarreak bi ahots solista ditu. Esan beharra dago kontzertu guztietan dutela Sotto Voce orkestraren laguntza.
Hasi dira entseguak
Dagoeneko hasi dituzte entseguak. "Bergaran entseatu dugu. Gustura geratu gara, abesbatza gazte eta onak dira", dio Carballok. Irailean Pasai San Pedron egingo dute entsegu orokorra.