Tavex enpresak kapitala handituko du 40 milioi eurotan

Bergarako Elorregi auzoan dagoen Tavex enpresak kapitala handituko du. Hain zuzen, Brasilgo Camargo Correa enpresak babestuko du kapital handitzea. "Brasilgo enpresa da gure akziodun garrantzitsuena %54,5arekin", esan zigun 6eko idazkari orokor Manu Diazek. Diazen hitzetan, kapital handitzearen helburu nagusiena da enpresak duen finantza-egitura eta dituen akziodunak indartzea.

 

Kapital handitzea

Kapital handitzea nola egingo den azaldu digu Manu Diazek. "Lehen lehenik akziodunei akzio berriak erosteko aukera ematen zaie, eta haiek aurretik zituzten akzioei gehitzen zaizkie. Era berean, akzio gehiago gura ez dituenak ez dauka erosi beharrik".  Tavexek egingo duen kapital handitze honek berritasun bat du. "Akziodunek erosten ez dituzten akzioak Camargo Correa enpresak erosiko ditu. Hala, kapital handitzea 40 milioi eurotakoa izango dela ziurtatzen dugu eta hori ez da oso ohikoa. Kapital handitzea erabatekoa izango da eta hori oso ona da guretako: lasaitasuna emango digu. Batez ere, kanpora begira gure taldeak duen irudia asko hobetuko da".

Kapital handitzea ondo datorkio Tavex enpresari eta, dagoeneko, badakite zer egingo duten 40 milioi eurorekin. "Ez dugu proiektu berririk jarriko martxan. Baina, egun, gure taldeak dituen proiektuak bideratzeko lagunduko digu", dio Diazek.

Hainbat filial

Tavex 1846. urtean sortu zen Bergaran. 1901.urtean Algodonera de San Antonio SA izena hartu zuen. 1989an Grupo Tavex sortu zuten. Gaur egun, 5.000 langile ditu taldeak, eta bazkideak, 50 herrialdetan. Bost lantegi ditu Brasilen, bat Argentinan eta beste bat Txilen eta haiei Valentzia, Maroko eta Elorregiko lantegiak gehitu behar zaizkie.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.