Doako TAO zerbitzuaren aldeko apustua egin du Bergarako Udal Gobernuak eta dagoeneko martxan da zerbitzua, herriko lau gunetan:
| Tokia | Denbora |
|---|---|
| Oxirondo plaza |
Gehienez hiru ordu |
| Ibargarai | Gehienez hiru ordu |
| Erdiguneko kaleak |
Gehienez ordu t'erdi |
| San Martin plaza |
Gehienez 30 minutu |
Astelehenean hasi ziren zerbitzu berriarekin eta poliki-poliki jendea badabil ohiturak aldatzen.
Juanjo Arizmendi TAO zerbitzuko zaintzaileak azaldu digunez, zerbitzuaren helburua da erdigunean autoen txandakatzea egotea. Gune guztiek ordutegi bera izango dute:
- astelehenetik egubakoitzera: 9:00-13:00 eta 16:30-20:00
- zapatuetan: 9:00-13:30
Gainerako orduetan, hau da, eguerdian eta gauez ez da TAOrik egongo. Momentuz, hamar-hamabost eguneko epea izango dute herritarrek funtzionamendua ikasteko eta epe horretan ez dute isunik jarriko.
Makinak
Tiketa ateratzeko bederatzi makina egongo dira eta autoaren matrikula sartu beharko da. Tiket horretan azalduko da auto hori toki horretan noiz arte egon ahalko den eta erabiltzaileak autoan jarri beharko du ondo ikusteko moduan. Momentuz, herritarrak pozik daude.
Bertakoendako txartelak
Bestalde, TAO gunean dauden kaleetako bizilagunek bertakoendako txartelak eskuragarri dituzte. Udaletxean eskatu beharko dute txartela eta urriaren 2ra arte leihatila berezi bat egongo da tramitazio horretarako. Udaltzainen esanetan, txartel hori ateratzeko mugimendu handia dabil egunotan.
Garaje pribatua duten bizilagunei, hori bai, dei egin diete autoa garajean sartzeko.