Hogeita hamar talde baino gehiagok hartu dute parte egunotan Iruñean egin duten lau eguneko itzulian. Haizeak aurreikusi baino gehiago gogortu du proba, baina Bergarakoek lan ona egin dute. Iker Sanchezek sei txirrindulari izan ditu bere aginduetara: Eneko Lizarralde, Mikel Aristi, Ander Telleria, Aitor Umerez, Jon Rivero eta Hodei Orobengoa. "Gustura goaz etxera bueltan. Eguaztenean susto galanta hartu genuen Eneko Lizarraldek izan zuen erorikoarekin, auto artean erori zen-eta. Ospitalean igaro zuen gaua, baina hurrengo egunean gurekin jarraitu zuen etapa. Hori izan da, duda barik, momentu txarrena, baina egia esan, gazte hauekin edozein tokitara joan gaitezke, ederto portatu dira-eta".
Emaitza esanguratsuena Mikel Aristik eskuratu du, hirugarren etapan onena izan zen, baina eguneko lehenengo ezusteko positiboa lasterketa hasi aurretik jaso zuen, argazkiko mailot horiarekin korritu behar zuela esan zioten, sailkapen orokorrean gazte mailako lehen urteko ziklisten artean bigarren zegoelako –baina lehenak beste mailot bat eraman behar zuen–. Hala, mailot batekin edo bestearekin, baina Aristik lehenengo postuan amaitu zuen etapa, Anjel de Julian Plaspisa taldeko txirrindulariari metro bateko aldeagatik irabazita, eta sailkapen orokorrean 14. postuan sailkatu da.
Gaur, egubakoitza, berriz, gutxigatik ez du bigarren garaipena lortu, bosgarren sailkatu da Aristi, 23 segundora.