Unai Iñarrak zuzentzen duen taldeak maila berria estreinatuko du; probintzial maila, alegia. "Liga hasteko irrikatan gaude. Dena den, badakigu maila berria indartsuagoa dela. Iazkoarekin alderatuta ezberdintasun asko daude, baina tira...", esan digu Unai Iñarrak.
Denboraldiko helburu nagusia maila mantentzea da, baina urtea partiduz partidu antolatuko dutela esan digu: "Maila berriari neurria hartu behar diogu. Partiduz partidu joango gara, baina denbora galdu gabe. Emaitza onak lortzen baditugu, agian gure helburuak aldatu egingo dira. Urte bukaeran sailkapenak jarriko digu dagokigun tokian".
Hamasei talde
Soraluze BKE 15 talderekin lehiatuko da, bi itzulitara. Oiartzun, Atco San Sebastian, Biok Zerbitzuak, Kostkas, Santo Tomas Lizeoa, Internacional, Beiztinberri, Beasain, Kevian Sport, Zarautz, Astigarraga, Alde Zaharra eta Hernani taldeen aurka jokatuko dute bergararrek.
Azkeneko jardunaldia 2010eko maiatzaren 9an jokatuko dute. Sailkapeneko lehen bi taldeek igoera jokatuko dute, eta azken hiru tokietan daudenek maila galduko dute.