Aritzetako San Migel kaleko 7 eta 9 zenbakiak botatzen hasi ziren atzo, eguena, San Antonio auzoaren biziberritze planaren barruan.
Udal arduradunek azaldu dutenez, asmoa da lagako duten orubea txukundu eta aparkaleku moduan egokitzea, herrian dagoen aparkaleku arazoa aintzat hartuta. Lan horiek egiteko Eusko Jaurlaritzaren laguntza izango dute nahiz eta oraindik ez dakiten zenbateko kopurua jasoko duten. Bestalde, San Antonio kaleko 4, 6 eta 8 zenbakiak botatzeko asmoa ere badu Udalak eta horiek erosten dihardu. Zenbakiok, orain botatzen diharduten etxebizitzen parean daude.
Horrekin guztiarekin, San Antonio auzoa biziberritzeko beste urrats bat eman du Udalak. Orain arte Martokorako oinezkoendako ibilbidea eta errepidea txukundu dituzte eta baita pasealeku horretan eserlekuak eta iturria jarri, eta parketxoa egokitu ere.