San Martin ikastetxeko ordezkariek, EAJ eta EA alderdien babesarekin, mozioa aurkeztu zuten. Bertan azaltzen zuten euren instalazio eta beharren inguruko txosten bat landu zutela eta hezkuntzako lurralde ordezkaritzak berdina egin zuela Martinez de Irala eraikinaren inguruan. Gaineratzen zuten, herriko ikastetxeen benetako egoeraren diagnostikoa egin ahal izateko, Aranzadi ikastolak Errege Seminarioan jasotzen duen instalazioen txosten teknikoa egitea beharrezkoa dela.
Mozio alternatiboa
Mozio horren partez, udal gobernua osatzen duten Eusko Abertzale Ekintza eta Aralarren aldeko botoekiin mozio alternatibo bat onartu zuten gai honen inguruan. Bertan, Hezkuntza sailak Aranzadi ikastolak Errege Seminarioan orain dituen eta aurrerantzean izango dituen instalazioei buruz txosten bat egitea onartzen da. Baina San Martingo gurasoak ez daude guztiz ados mozio honek jasotzen dituen zenbait punturekin.
Onartutako mozioak dioenaren arabera, eskola biek eta Hezkuntza sailak lan mahaia eratuko dute epe motz eta ertainerako konponbideak lortzeko, eta Udalak eta Hezkuntza sailak hiru hilabeteren epean eskolei epe luzerako proposamen bat egingo diete.
Hezkuntza saileko bilerarekin gustura
San Martin ikastetxeko ordezkariek diote, urriaren 19an Hezkuntza saileko ordezkariekin egindako bileretan jasotako plana gustuko dutela: datorren urtetik aurrera, hiru gela izango dituzte Martinez de Iralan, eta 2012rako, akaso lehenagorako, Martinez de Iralako eraikin guztia eurentzat izango da. Hala ere, euren kezka tarteko urteak direla azaldu dute eta lan mahaietan horren inguruan hitz egiteko bilduko direla.
Adostutakoaren arabera, Martinez de Irala eraikinean dagozkien hiru gelak 2008ko urtarrilaren 7rako erabilgarri egoteko nahia adierazi dute San Martin ikastetxeko ordezkariek.