Pirritx, Porrotx eta Mari Motots pailazoek datorren domekan, hilaren 14an, Udal Pilotalekuan egingo duten Irrien lagunak ikuskizunerako sarrerak geratzen direla azaldu dute Udal arduradunek. Sarrerok emanaldi egunean leihatilan salgai jarriko dituztela ere aurreratu dute. Bi emanaldi izango dira: 16:00etako emanaldirako 212 sarrera daude eskuragarri eta 18:30eko ikuskizunerako, berriz, 78. Leihatila, 15:00etan irekiko dute eta kontuan izan behar da sei sarrera baino gehiago ezingo dituela erosi pertsona bakoitzak.
Kontzerturako sarrerak
Udal Musika Bandak eta Bergarako Orkestra Sinfonikoak egubakoitzean egingo duten Inauteri-kontzerturako sarrerei dagokienez, eskuragarri daude oraindik ere kultura etxean eta Lazkano oinetako dendan, 5 euroren truke. Leihatilan ere salduko dituzte. Emanaldia hasiko da 22:30ean, Udal Pilotalekuan.
Mexiko da Udal Musika Bandak eta Bergarako Orkestra Sinfonikoak aukeratu duten gaia aurtengo kontzerturako. Bi zati izango ditu; lehenengoan musika bandak eta orkestrak bakarka jardungo dute; bigarrenean, biak elkarrekin arituko dira. Hain justu, Camino al Rocio delako ikuskizuna aurkeztuko dute bi taldeek, Alfredo Gonzalez Chirlaqueren zuzendaritzapean.